वाघोबा at ताडोबा भाग - १

"Hey Rodney , Good Morning."
"Very Good Morning .. Tell me."
"Rodney , I am planning to take vacation in November for 2- 2 1/2 weeks."
"OK , dates?"
"From 10th till 30th . Can  you Pl. let me know if it's OK at the earliest as I need to book my flight ."
"OK.. will let you know by end of day."
"Thank You Rodney."

 Manager बरोबर  वरील संभाषण ऑगस्ट महिन्यातलं . गेले वर्ष दीड वर्ष आस्मादिक मधु इथे (USA ) आणि चंद्र दोन उपग्रहांसह तिथे (पुणे ) परिस्थितीत . हम्म … बरोबर आहे ना ?…. म्हणजे मी मधू आणि बायको चंद्र ?? जाऊ दे ...  मला हे न सुटलेलं कोडं आहे .. कोण मधु आणि कोण चंद्र . असो . संध्याकाळी Manager चा मेल आला . "Go Ahead "... वाह…. लगेच तिकीट काढले . रात्री पुण्याला ही बातमी सांगितली मंडळी खुश झाली .
पुढची गोष्ट म्हणजे काय काय करायचं ह्याचं planning सुरु झालं . मुलांना आणि सौ. च्या शाळांना सुट्टी असल्यामुळे , दिवसांचा प्रश्न नव्हता . दिवाळीचे दिवस झाल्यावर बाहेर जाऊ असे ठरले . पुढचे प्रश्न  , कोण कोण , कुठे , कधी ???
खूप  दिवसांची इच्छा होती की आपण जंगल सफारी करावी . मागे वायनाड ला गेलो होतो तेव्हा जंगल पाहिले होते , पण ती काही खरीखुरी  सफारी नव्हती . विचार सुरु झाल्याबरोबर काही नावं समोर आली , कान्हा , बांधवगड , पेंच , ताडोबा वगैरे … जबलपूर , भेडाघाट , बांधवगड हा plan मस्त वाटला . पाच - सहा दिवसांत होण्यासारखा . घरी बोललो . बायको ,मुलं देखील हो म्हणाली . लगेच आई  , बाबा , बंधुराजां (मु. पो .  मुंबई)  बरोबर  बोलणे झाले . त्यांना देखील बेत पसंत पडला . म्हणजे एकूण सहा मोठे आणि तीन लहान असं  नऊ लोकांच भ्रमण मंडळ तयार झालं . पुढचा प्रश्न म्हणजे कसं जायचं ? रेल्वे / विमान पर्याय . लगेच IRCTC ची आराधना सुरु केली . नवीन नियमानुसार आता चार महिने आधी रेल्वेचं आरक्षण होतं , त्यामुळे ही  लढाई जिंकता येईल की नाही ? हा मोठाच प्रश्न होता . हर हर महादेव !!! बर्याच  पर्याय  आणि प्रयासाने जबलपूरची जायची , यायची तिकिटे मिळाली . हुश्श …. मोठीच लढाई जिंकली होती . पण …. Reservation च्या नादात एका गोष्टीकडे आम्ही लक्षच दिले नव्हते . बांधवगडच्या सफारी ह्या online बुक करता येतात आणि त्या ३ -४ महिने आधी बुक  होतात . हे लक्षात आल्यावर बर्याच Resorts ना फोन लावले आणि बुकिंग साठी विचारले पण ईल्ले … सगळ्यांनी सांगितले आता सफारी नाही मिळणार . सफरीच नसेल तर तिकडे जाऊन काय करणार . शेवटी lifeline घ्यायचे ठरवले . बाईसाहेबाना इथे चौकशी करायला सांगितले . तिथे सुध्दा नकारघंटाच ऐकायला मिळाली , पण त्यांनी दुसरा पर्याय सुचवला . Why not Taadoba ? हम्म … Interesting. पण सफारींच काय?
मिळेल म्हणाले , २ दिवसांत  सांगतो . थोडी धुगधुगी आली . २ दिवसांनी फोन केला , तर अजून नाही कन्फर्म.   अजून २ दिवस थांबा . अरे देवा !!! मी तर बायकोला दगडूशेटला जाऊन यायला सांगितले . २ दिवसांनी सकाळी WhatsApp वर बायकोचा मेसेज  "Safari available" .  YES !!! लगेच रिप्लाय टाकला "बघितली दगडूशेटची कृपा … " तिचं लगेच उत्तर "मी गेलेच नव्हते " … ठीक है . ठीक है. होत असं कधीकधी . १५ ते १७ नोव्हेंबर , ४ सफारी (१५ ला दुपारी , १६ सकाळ / दुपार, १७ सकाळ ) असा बेत ठरला . त्यांनी Resort बुकिंग आणि  सफारी असं package सांगितले , थोडं महाग वाटलं पण जास्त नाही . लगेच advance भरुन कन्फर्म  केलं आणि जबलपूर चे Reservations कॅन्सल केलं . आता परत तोच प्रश्न , कसं जायचं ? ४ पर्याय …

१. रेल्वे ने नागपूर आणि तिथून ताडोबा बाय रोड (३ तास )
२. विमानाने नागपूर आणि तिथून ताडोबा बाय रोड
३. बसने चंद्रपूर . पुणे - चंद्रपूर खाजगी बसेस आहेत .
४. वरीलपैकी कोणताही नाही  …जो आम्ही निवडला .

पुन्हा एकदा IRCTC ची आराधना चालू केली , पण ह्यावेळेस काही फळ मिळाले नाही . सगळ्या गाड्या फुल्ल … फार प्रवास करतात नाही लोकं . मग विमान कंपन्यांची availability बघायला सुरुवात केली . पण दिवस आणि भाडं ह्यांच गणित काही बसेना . ज्यादिवाशीच हवं ते नेमकं महाग . महाग म्हणजे काय च्या काही महाग . आता पर्याय बसचा . सौ. नी चौकशी सुरु केली. सगळ्यांनी सूर लावला अजून खूप अवकाश आहे . इतक्या लवकर काही सांगू शकत नाही . आम्ही समजलो काय समजायचे ते . दिवाळी चे दिवस , भाडं वाढवणार म्हणून आत्ताच काही सांगत नाहीयेत . पण पर्याय नव्हता . Just Wait and Watch .
दरम्यान माझ्या मित्राकडे चौकशी केली , तो नेहेमी पुणे - चंद्रपूर बसने प्रवास करतो . तो म्हणाला दिवाळीच्या दिवसांत हे लोकं खूप लुटतात . ३००० ते ३५०० तिकीट असू शकेल . मी हिशेब केला म्हणजे कमीतकमी ५४०००/- जाऊन येऊन  लागणार . जास्त वाटले . पण काय करणार पर्याय नव्हता .

खरंच पर्याय नव्हता ??  का काही दिवसातच मिळणार होता ?? 
 
 

क्रमश: